Norsk Lovtidend avd I nr 9 2000

INNHOLD

Forskrift om tilskott til organisert beitebruk.
    §l. Formål
    § 2. Avgrensing
    § 3. Administrasjon
    § 4. Utval i fylka
    § 5. Vilkår for tilskott
    § 6. Krav til beitelag
    § 7. Godkjenning av lag, registrering, informasjonsplikt
    § 8. Tilskott
    § 9. Saksbehandling og utbetaling
    § 10. Tilbakebetaling av tilskott
    § 11. Kontroll
    § 12. Dispensasjon
    § 13. Klage
    § 14. Iverksetting

DATO: 01.04.2000 nr. 344
DEPARTEMENT: LD (Landbruksdepartementet)

Forskrift om tilskott til organisert beitebruk.

Fastsett av Landbruksdepartementet l. april 2000 i medhald av jordbruksoppgjeret og med heimel i lov av 12. mai 1995 nr. 23 om jord (jordlova) § 3 og § 18 og etter samråd med Norges Bondelag og Norsk Bonde- og Småbrukarlag.
§l. Formål

Formålet med ordninga er å legge tilhøva til rette for best mogleg utnytting av beite i utmark og redusere tap av dyr på utmarksbeite gjennom organisert tilsyn, organisert sanking og andre målretta fellestiltak i beiteområde.

§ 2. Avgrensing

Tilskott til organisert beitebruk gjeld sau, geit og storfe som beiter i utmark i minst 8 veker. Mjølkande kyr og geiter og dyr som heile beitesesongen beiter på innmark som følgje av førebyggande tiltak mot rovviltskader og/eller sjukdomar er ikkje omfatta av denne ordninga. Fylkesmannen kan gi unntak frå regelen om 8 veker.

§ 3. Administrasjon

Ordninga med tilskott til organisert beitebruk blir leia av styret for Tiltaksfond for småfe og fjørfe m.m. Styret skal sjå til at tilskottsordninga blir gjennomført i samsvar med gjeldande forskrift og dei instruksar som blir gitt av Landbruksdepartementet. Søknader om godkjenning av beitelag og tilskott blir avgjort av fylkesmannen som også utbetaler tilskott til organisert beitebruk.

§ 4. Utval i fylka

Fylkesmannen skal oppnemne rådgjevande utval for organisert beitebruk i fylket. Utvalet skal ha 4 medlemmer med personlege vararepresentantar oppnemnde for ein periode på 4 år. To av medlemmene med vararepresentantar skal oppnemnast etter forslag frå Norsk sau- og geitalslag i fylket. Fylkesmannen oppnemner leiar i utvalet. Sekretariatet skal leggast til fylkesmannen.

§ 5. Vilkår for tilskott

Det er eit vilkår for å få tilskott gjennom organisert beitebruk at husdyreigarane er organisert i beitelag (jf. § 7 og § 8) og det i den tid dyra går på beite drives i samsvar med lover og forskrifter som gjeld for husdyrhald.

§ 6. Krav til beitelag

1. Laget skal ha eigne lagslover og eit styre vald av medlemmene i laget, og føra protokoll frå alle møter der det blir gjort vedtak.
2. Laget skal vera ope for brukarar som har tilgang til utmarksbeite i eit område der samarbeid kan fremme bruken av beiteområda.
3. Laget skal føra rekneskap for den økonomiske verksemda i laget i tråd med gjeldande reglar og god rekneskapsskikk.
4. Laget skal bruka alle tilskott til laget til å fremme den organiserte beitebruken i området gjennom felles tiltak.
5. Laget skal organisere effektivt og forsvarleg tilsyn og sanking av eigne og andre sine dyr i laget sitt område, tilpassa lokale forhold. Beiteområdet skal inspiserast minst ein gong pr. veke, slik at unormale tilhøve blir oppdaga og nødvendige tiltak blir sett i verk.
6. Laget skal samarbeide med tilgrensande lag når det kan effektivisera ressursbruk og utnytting av beita, dette gjeld særleg sanking og ettersanking.
7. Laget skal notere på fastsett skjema opplysningar om gjennomført tilsyn (dato, tilsynsrunde, unormale tilhøve i beiteområdet og tiltak som er sett i verk). Fylkesmannen og kommunen kan i særlege høve be om å få lagt fram denne dokumentasjonen.
8. Laget skal sende årsrapport på fastsett skjema til kommunen (jf. søknad om tilskott § 8 a).

§ 7. Godkjenning av lag, registrering, informasjonsplikt

Søknad om godkjenning av lag skal stilast til fylkesmannen i fylket der største delen av beitet ligg og sendast beitekommunen i dette fylket. Nyregistrerte lag skal ha minst 5 medlemmar og 300 småfeeiningar. Minstekrav for eksisterande lag er 3 medlemmar og 150 småfeeiningar. l småfeeining = 0,1 storfe = l sau = l lam = l geit = l kje. Kvar enkelt dyreart frå same bruk skal organiserast i same lag. Fylkesmannen kan i særlege tilfelle gjera unntak frå desse krava. Fylkesmannen kan òg koma med pålegg om samanslåing eller deling av lag.

Godkjende lag skal registrerast i kommunen der største delen av beitet ligg. Dersom laget beiter i fleire fylke må fylkesmennene i beitefylka saman bestemme i kva fylke og kommune laget skal registrerast.

Beitelag som nyttar beite i andre kommunar/fylke enn registreringskommunen/fylket, skal kvart år som informasjon sende kopi av søknad om ordinært tilskott til desse, evt. vedlagt endring av beiteavtale/beiteområde.

§ 8. Tilskott

a. Ordinært tilskott til drift av laget

Laget kan søkje om ordinært tilskott til drift på fastsett skjema. Tilskott blir gitt med eit fast beløp pr. storfe og pr. småfe som kjem att frå beite om hausten.

b. Tilskott til investeringar og ymse tiltak

Det kan etter søknad på fastsett skjema løyvast tilskott til investeringar og ymse tiltak i beitefelt som laget ikkje på rimeleg måte kan dekkje sjølv. Tilskott kan løyvast med inntil 50% av godkjent kostnadsoverslag. Investeringa skal:

verka til meir effektiv og rasjonell utnytting av beiteområdet,
i hovudsak knytast til faste installasjonar,
koma flest mogleg beitebrukarar til gode,
ta omsyn til alle slag beitedyr i området.

Tilskottet gjeld ikkje fellessetrer for geit. Tilskott skal ikkje løyvast til same installasjon før etter minimum 15 år (hytter 20 år) frå første gong tilskott blei gitt.

c. Tilskott til tilsyn med ny sau etter nedslakting pga. mædi eller skrapesjuke

Etter nedslakting av buskap på grunn av sjukdommane mædi eller skrapesjuke kan det løyvast tilskott til tilsyn med ny sau på utmarksbeite. Med søknaden skal følgje dokumentasjon på gjennomført nedslakting og veterinæren si godkjenning av pålagde saneringstiltak, dokumenterte innkjøp og påsett av ny sau. Fylkesmannen kan for denne ordninga gi dispensasjon frå § 5 slik at det kan betalast ut tilskott til husdyreigarar som ikkje er medlem i organisert beitebruk.

§ 9. Saksbehandling og utbetaling

Beitelaget skal søke om ordinært tilskott og investeringstilskott på søknadsskjema som gjeld for ordninga med nødvendige vedlegg til kommunen, der laget er registrert, innan l. november. Tilsendt medlemsliste på diskett skal fyllast ut og returnerast kommunen som vedlegg til søknaden.

Tilskott etter § 8 b kan betalast ut med inntil 75% av innvilga sum når tilsvarande del av arbeidet er utført. Sluttutbetaling skal ikkje skje før arbeidet er fullført og det er gjeve ferdigattest av tilsynsmann oppnemnt av fylkesmannen. Fylkesmannen kan pålegga kommunen tilsynsoppgåver. Fylkesmannen kan kreve at det blir lagt fram rekneskap for investeringa/tiltaket. Beitelaget har frist på 2 år frå tilskottet er løyvd til å ferdigstille tiltaket.

Søknad om tilskott etter § 8 c skal sendast kommunen innan 20. januar. Dette tilskottet kan utbetalast med inntil 75% av innvilga sum i løpet av beitesesongen. Sluttutbetaling skal ikkje skje før rapport om tilsynet er motteke og godkjent av fylkesmannen.

Det er ikkje høve til å overføre tilskottsmidlar frå laget til medlemmane.

§ 10. Tilbakebetaling av tilskott

For mykje utbetalt tilskott eller urettmessig utbetalt tilskott kan krevjast tilbakebetalt eller bli trekt i seinare utbetalingar. Dersom feil opplysningar frå søkaren har ført til for mykje utbetaling kan det krevjast morarente for tida frå utbetaling av tilskott til tilbakebetaling har funne stad. Det samme gjeld også når søkaren burde ha visst eller forstått at utbetalinga var feil.

§ 11. Kontroll

Lag som søker om tilskott til organisert beitebruk pliktar å gi fullgode opplysningar og godta kontrolltiltaka som blir fastsette. Riksrevisjonen og Landbruksdepartementet har rett til å føreta den kontroll dei finn nødvendig.

Fylkesmannen skal føre kontroll med at oppgitte data i søknaden er rette, og at søknadene blir avgjort i samsvar med gjeldande forskrift. Dersom det blir gitt feil opplysningar i søknaden, kan søknaden bli avslått eller tilskottet redusert.

§ 12. Dispensasjon

Landbruksdepartementet kan i særlege høve dispensere frå forskrifta. Ein dispensasjon kan ikkje vere i strid med føremålet for ordninga. Det er ikkje høve til å klaga til Kongen i statsråd på dispensasjonsvedtak fatta av departementet.

§ 13. Klage

Vedtak som er fatta i medhald av denne forskrift kan påklagast etter kap. VI i forvaltningslova av 10. februar 1967. Klage på saker som er avgjort av fylkesmannen skal stilast til Tiltaksfond for småfe og fjørfe m.m. og sendast til fylkesmannen. Klage på saker som er avgjort av styret for Tiltaksfond for småfe og fjørfe m.m. skal stilast til Landbruksdepartementet og sendast til Tiltaksfondet.

§ 14. Iverksetting

Denne forskrift gjeld frå 1. april 2000. Frå same tid blir forskrift om tilskott til organisert beitebruk frå 15. april 1997 nr. 405 oppheva.